Hér í Danmörku, eru svokallaðir mömmuklúbbar útum allt. Þetta virkar þannig að hjúkkan smalar saman mömmum sem hafa átt á svipuðum tíma og hittist með þeim. Í mínum klúbbi var fyrsti hittingur í gær. Ég skellti mér í gönguskóna og ákvað að rölta þetta, en klúbburinn var haldinn heima hjá einni mömmunni, niðri í Veigaard, það er næsta hverfi við okkur. Þarna voru börnin vigtuð og skoðuð á alla kanta. Skvísan búin að þyngjast um 400 gr á tæpri viku orðin 6650 gr. Hún virkaði nú reyndar ennþá stærri þarna þar sem hin börnin voru öll fædd í mars. Hinar mömmurnar búa allar í Veigaard, sennilega frá 5-10 mínútna göngufjarlægð á milli þeirra, ég var rúman hálftíma að arka þetta. Og þær eru allar með fyrsta barn. Þannig að í fljótu bragði fannst mér ég nú ekki passa neitt sérstaklega vel inn í hópinn. Næsti skipulagði hittingur er með hjúkkunni í lok mai, ég býst nú ekkert frekar við að hitta þær fyrir utan það. Var annars að vona að þetta væri góð leið til að halda dönskunni við svona í fæðingarorlofinu. Verð þá bara að vera dugleg að spjalla í mömmuleikfiminni

Svo erum við mæðgur í íslenskum mömmuklúbb, svo það er nóg að gera ; ) Í þeim íslenska er prinsessan okkar sú minnsta ennþá, en það bætast við ný börn í sumar.

Í dag er svo fælles matur í Dusnum, það er í skólagæslunni. Virkar þannig að allir mæta með mat á borðið og svo er bara risahlaðborð, nammi namm. Sniðug leið til að hitta starfsfólkið og hina foreldrana.

Jæja best að fara að koma sér út í vorið...

Í dag vildi ég svo gjarnan vera á Íslandi, það er ekkert gaman að vera í Danmörku á sumardaginn fyrsta. Það eru svo ótalmargar minningar sem fylgja þessum degi, hvort sem það var á Selfossi að berjast við Kára um hver hefði betur í baráttunni um fánana. Ja eða bara að njóta veðurblíðunnar. Eftir að ég flutti til Reykjavíkur var fastur liður að fara í skátamessu í Hallgrímskirkju, ja og auðvitað í skátakaffi á eftir. Verð bara með ykkur öllum í huganum á þessum hátiðisdegi. Dagurinn er nú kannski á undanhaldi líka, ja svona ef hann verður bara fluttur, þar sem fimmtudagsfrí þykja ekki svo praktísk.

Jæja að lífinu hér hjá okkur. Þá eru allir gestirnir komnir til síns heima og allt að komast í eðlilegt horf hérna. Þetta fór allt saman fram úr björtustu vonum, það er sko greinilega ekkert mál að hafa allt fólkið okkar hérna á sama tíma. Nú er bara að jafna sig eftir þvílíkt páskaát. Svona á milli máltíða kíktum við meðal annars á Nordsjömuseum, sáum kafara gefa fiskunum, klöppuðum sjávardýrum og skoðuðum þau í návigi.

Eftir fiskasafnið skiptum við liði þar sem hluti af hópnum kíkti í Tívolíið hér í Álaborg og hinn hlutinn skoðaði forminjar og nýfædd lömb í nágrenninu. Ég fór með syni mínum í einn rússibanann og úff það geri ég nú ekki aftur. Hef nú prófað nokkra rússibana og mæli hreint ekki með þessum, þetta var bara vont. Tækið er greinilega úr sérgengið miðað við það sem maður á að venjast í dag. Vorum alltof laus í tækinu, sem hökti til og frá, þannig að ég átti í mestu vandræðum með að halda höfðinu sæmilega uppréttu. Það skemmtilegasta í garðinum var án efa speglasalurinn, skemmtum okkur öll saman þar, ég hefði nú ekki haft neitt á móti því að fá einn spegilinn með heim. Sonur minn hefði reyndar sennilega ekki valið sama spegil og ég

Ég fór svo með prinsessuna í vigtum í gær. Hér getur maður farið í opin tíma hjá hjúkkunni þar sem hún kíkir á krílin, viktar og mælir. Daman er orðin 6.250 gr og 61 cm. Dafnar sem sagt alveg stórvel, jæja hún er líka farin að kalla, bless í bili

Litla prinsessan var skírð á Skírdag, það var hin fínasta athöfn. Eftir messuna vorum við með kaffiboð hér heima hjá okkur. Það er sko alveg greinilegt að íbúðin okkar tekur lengi við fólki, enda var þetta um 30 manna veisla. Takk æðislega þið sem gátuð verið hér með okkur og þið hin fyrir sendingarnar og kveðjurnar. Fyrsti afin var að fara í skip aftur núna áðan, það var svo heppilegt að hann tók Opelinn okkar með sér. Núna eru hér samt sem áður tvær ömmur og tveir afar ennþá, ja og tveir frændur að auki

Ömmurnar voru duglegar að koma með nauðsynjar með sér frá Íslandi, við fengum m.a. ýsu, harðfisk, grænar baunir, mysing og páskaegg. Sumt er bara betra íslenskt ætli cherioos fari ekki að bætast á óskalistann okkur yfir sendingar að heiman, svona þegar prinsessunni fer að vanta eitthvað að tína upp í sig.

Ég fór með foreldrum mínum í Götuna í gær, svona rétt til að sína þeim skemmtanalífið í Álaborg. Það var sko greinilegt að vorið er komið, reyndar virtust margar að stelpunum halda að það væri komið hásumar. Ja það styttist alla vega í það, sólin skín í dag og ég er búin að vígja nýja garðsettið.

Aðrar fréttir vikunnar eru þær að við keyptum okkur nýjan (gamlan) bíl, Ford Mondeo station. Svo nú á aldeilis að vera hægt að krúsa um Evrópu í sumar.

Sólskinskveðjur frá Álaborg

Þetta virðist vera mikið en konan mín hefur nú heimsótt ennþá fleiri lönd.

Það styttist í skírnina á prinsessunni og jú við erum búin að ákveða nafnið, það verður nú reyndar ekki gefið upp fyrr en á fimmtudaginn. Fyrsti afinn er mættur á svæðið, kom með Norrænu í gær. Næsti gestahópur kemur á þriðjudaginn, þá fæ ég að opna forvitnilega kassann sem mamma sendi með Norrænufaranum. Svo koma enn fleiri gestir á miðvikudaginn, við erum sem betur fer búin að fá lánaða aukaíbúð svo allir ættu að komast fyrir með góðu móti.

Prinsinn hélt afmælisveislu númer 2 um síðustu helgi, þar sem við skelltum okkur í Jumboland með íslensku vinina sem ekki eru í bekknum. Þetta er sem sagt risa hoppu og klifurland, svaka fjör þar. Gaurarnir voru vel svitastroknir enda var lítið stoppað.

Við erum búin að panta flug til Íslands þann 28. júní, fljúgum svo út aftur frá Akureyri þann 13. júlí svona rétt eftir afmælið hennar mömmu Sonurinn verður svo aðeins lengur á landinu, þannig að ef einhver er á leið til Dk í kringum 25. júlí sem vill leyfa honum að verða samfó, þá væri það vel þegið. Hann er orðinn vel ferðafær með nýju ferðaplaystation tölvuna frá afa á Jersey.

Skvísan stækkar og dafnar, ég held reyndar að hún kunni ekki alveg sitt magamál, humm hvaðan ætli hún hafi það heheeh. Hún tekur nefnilega stundum upp á því að vilja drekka út í eitt, þar til ekki kemst meira fyrir. Ég á að mæta með hana í vigtun eftir páska, þá hittum við okkar hjúkku í annað sinn. Þeir eru víst ekki að stressa sig neitt á þessu hérna, svona með annað barn á maður bara að kunna þetta allt saman.