Nei við erum ekki búnar að stofna bumbuklúbb hérna, en gætum það víst alveg, það virðist nefnilega vera komin enn ein óléttu sprengja hér í Álaborg, ja eru alla vega þónokkuð margar óléttar núna. Ég fékk lánaða alveg frábæra óléttubók eina sem sér spaugilegu hliðarnar við þetta allt saman, verst hvað það er erfitt að fá hláturskast núna.

Ákvað að deila með ykkur smá broti um brjóstagjöf, móðirin hafði sem sagt gefist upp á að gefa barninu brjóst og var ákveðin í að notast við pela. Fyrstu nóttina heima fór ég fram úr um þrjúleitið til að gefa Max að drekka. Síðan skreið ég hálfsofandi aftur upp í rúm. Þegar ég lagðist undir sængina fann ég fyrir rökum bletti í lakinu. Þetta var það ofarlega í rúminu að ég vissi að þetta gæti ekki hafa komið að neðan. Ég var dauðþreytt og öll rökhugsun var sem horfin úr hausnum á mér. Það eina sem mér datt í hug var leki í loftinu fyrir ofan rúmið. Bruce hélt hann væri að dreyma furðulegan draum þegar hann sá mig í svefnrofunum standa uppi í stiga og þreifa á loftinu til þess að reyna að finna þennan blessaða leka. Þegar ég sagði honum hvað ég væri að gera náði hann mér niður á jörðina á sinn varfærnislega og skilningsríka hátt með því að segja: "Elsku beljan mín, það eru júgrin á þér sem leka." Hann hefur aldrei haft tilhneigingu til að vanda málfar sitt. (Úr bókinni: Bumbuklúbburinn - Hjálp, ég er ólétt).

Eiginmaðurinn var annars að klára prófin í dag, búin að ná öllu með glæsibrag Erum því bæði í fríi í nokkra daga, svo það er vonandi að eitthvað spennandi gerist svona áður en hann á að mæta í skólann aftur.

Hér er í Danmörku er víst líka vetur eins og á Íslandi með snjó og skemmtilegheitum ; ) Fórum í þriðju skipurlögðu skoðun til ljósmóður á mánudaginn, lítur allt mjög vel út. Ég fékk aftur tíma eftir 4 vikur, reyndar með þeim orðum að hún byggist nú ekki við að sjá okkur þá. Úff vona nú að það sé rétt hjá henni og þetta sé búið fyrir þann tíma. Enda væri ég þá komin vel fram yfir settan tíma.

Erum búin að kaupa svaka fint skiptiborð, búin að þvo fyrstu fötin og strauja svo nú ætti allt bara að vera tilbúið. Krílið líka orðið nógu stórt svona miðað við áætlanir ljósmóðurinnar og sónarinn alla vega. Hún vildi meina að það væri sennilega orðið i kringum 3.100 gr. alveg að ná fæðingarþyngd prinsins á heimilinu og það þremur vikum fyrr.

Sonurinn er víst að fara til Íslands í vetrarfríinu, hann er alveg hoppandi glaður með það Mér finnst nú reyndar skrýtið að hann fari til Íslands en ekki við, það er bara vonandi að krílið láti ekki bíða of lengi eftir sér svo hann fái góðan tíma í stóra bróðir hlutverkinu áður en hann fer í frí.

Kveðja frá Álaborg

Ég var að skoða bloggið hjá nágrönnum mínum þegar ég rakst á enn einn spurningaleikinn. Ég tek venjulega ekki þátt í svona en þarna stóðst ég ekki mátið. Ég tek venjulega heldur ekki þátt í að dreifa svona en fyrst að ég tók þátt í þessu þá verð ég samkvæmt punkt númer sjö að setja þetta hér.

Skráðu nafnið þitt í athugasemdir og...

1. Ég segi þér eitthvað handahófskennt um þig.

2. Ég segi þér hvaða lag/mynd minnir mig á þig.

3. Ég segi þér hvaða bragð minnir mig á þig.

4. Ég segi þér fyrstu ljósu minninguna mína um þig.

5. Ég segi þér á hvaða dýr þú minnir mig. 

6. Ég spyr þig að einhverju sem ég hef velt lengi fyrir mér um þig.

7. Ef þú lest þetta verður þú að setja þetta á bloggið þitt!!!

Ég lofa samt engu...

Prófið gekk ágætlega hjá okkur, framlögnin virkaði alla vega. Ég hefði nú að vísu verið til í aðeins hærri einkunn, en jæja þetta er alla vega búið. Það er víst ekki alltaf hægt að toppa hlutina, svo það verður víst að duga að vera rétt fyrir ofan miðjan skalann.

Einhvern veginn er það ótrúlega skrítið að vera bara búin, gekk út úr skólanum ekki alveg viss hvenær ég mæti næst. Spurning hvort það verði ekki fyrr en eftir ár, eða hvort ég taki pínu lítið í haust, það fær víst allt að ráðast Mér datt í hug að fylgja jafnvel einu fagi í haust, bara svona til að fara hægt í gang aftur og létta á seinni önn, en við sjáum til.

Nú er virkilega hægt að fara að dúlla sér við að undirbúa komu krílisins, enda styttist í áætlaðan dag. Okkur vantar nú reyndar ekki mikið, eigum flest frá prinsinum. Fáum lánaða vöggu, við vorum nú reyndar farin að efast þar sem barnið sem notaði hana virtist ætla að nota hana mun lengur en foreldrarnir höfðu búist við. En það breyttist í gær svo það passar okkur. Er að hugsa um að kíkja svo í IKEA fljótlega og kaupa skiptiborð, þá er allt það helsta komið svona fyrir fyrsta tímann.

Jæja sófinn kallar

Það passaði víst ekki lengur að vera með færslu um jól og jólafrí, enda allt svoleiðis búið. Eiginmaðurinn er búin í fyrsta prófinu og á fullu að læra fyrir það næsta. Ég á að fara í vörn á verkefninu mínu þann 10. janúar, svo núna þarf víst að undirbúa framlögn á einhverju sniðugu til að bæta við verkefnið. Auk þess að reyna að undirbúa sig fyrir allar mögulegar spurningar úr verkefninu. Er einhvern veginn hálf hugmyndasnauð þessa dagana.

Það var nú hálf skrýtið að vera bara litla fjölskyldan heima í gær, eftir að hafa haft fullt af gestum síðan fyrir jól. Annars tókum við því bara rólega fyrir utan nokkrar bæjarferðir, heimsókn til ættingjanna í Vejle og svo var gripið i spil.

Ég held að prinsinn hafi bara aldrei fengið jafn mikið af jólagjöfum og í ár, það var alla vega alveg hellingur. Hér var algjört pakkaflóð undir og við hliðina á jólatrénu. Takk kærlega fyrir okkur og takk fyrir öll jólakortin. Við sitjum eftir með smá samviskubit, því ekki náðum við að koma jólakortum út þessi jólin komst víst ekki inní skipurlagið í þetta sinn, það kom þá að því að það klikkaði.

Við fórum í sónar í gær og er krílið orðið um 11 merkur og er allt eins og það á að vera, svo núna er bara að klára skólann í bili og þá má þetta alveg fara að koma. Jæja jæja það er nú samt um mánuður eftir sem er örugglega hægt að láta líða í undirbúningi.

Áramótaknús frá Álaborg