Kæra stjórn DIFN

Báðir þessir kostir eru spennandi en á þeim er samt töluverður munur. Ég hef eftir öðrum leiðum fengið meiri upplýsingar um báða þessa kosti og finnst að það séu ansi mörg mikilvæg atriði sem að þið sleppið að nefna.
 
Til þess að Árósamenn geti gert þetta svona veglegt hafa þeir fengið til samstarfs við sig Eimskip, Marel og Flugleiðir. Samkoman verður jafnframt árshátíð fyrir starfsmenn Eimskips og Marels og svo er verið að athuga með að flugleiðir auglýsi og selji miða frá Íslandi til að ná fleiri seldum miðum. Að auki var Íslendingafélaginu í Horsens boðið að koma líka en þau afþökkuðu. Eftir stendur að á mig virkar þetta frekar sem nokkurhundruð manna ball með Sálinni en þorrablót Íslendingafélagsins í Álaborg.
 
Í Árósum er staðsetningin vöruskemma á hafnarsvæðinu. Það er vissulega mögulegt að gera þannig húsnæði vistlegt en virkar samt frekar kuldalegt á mig.
Samkomuhúsið sem er búið að panta hér, er innanbæjar og passar vel fyrir þorrablót DIFN.
 
Í póstinum stendur að Árósamenn bjóði DIFN að taka þátt í þeirra þorrablóti. Þýðir það að DIFN beri líka fjárhagslegar skuldbindingar ef að æfintýrið gengur ekki upp?
Í póstinum stendur ekki hvað það mundi kosta DIFN að borga undir rútu til Árósa. Það er alveg örugglega ekki gefið á helgar/nætur taxta. Mín skoðun er sú að peningnum sé betur varið í að styrkja þorrablót DIFN sem að er innanfélagsviððurður og félagsmenn eru tilbúnir að leggja bæði tíma og vinnu í að undirbúa. Þannig eflir stjórn DIFN starfið í félaginu og virkjar fleiri félaga beint í störfum þess.
Í póstinum stendur; "en ljóst er að þorrablótið verður að standa undir sér". Já, en ekki hvað? Auðvitað á blótið að standa undir sér og það er hlutverk þorrablótsnefndar og stjórnar DIFN að gera fjárhagsáætlunina þannig úr garði að blótið standi undir sér. Átti þessi setning að hafa áhrif á það hvorn kostin ég sem almennur félagsmaður mundi velja? Og ef svo er, hvernig þá? Miðað við núverandi fjárhagsáætlun stendur blótið undir sér með 350 kr miðaverði og sama fjölda og kom í fyrra.
 
Tilboðið frá Árósum er ekki svo galið. Böll með Sálinni standa alltaf fyrir sínu og eru örugglega ekkert verri með fleirihundruð manns. En það kæmi ekki í staðin fyrir þorrablót í mínu félagi. Svo hef ég takmarkaðan áhuga á að sitja amk. þrjá tíma í rútu báðar leiðir og líklega lengur, því gera má ráð fyrir ælu og pissustoppum á heimleiðinni. Þá á eftir að taka með í reikninginn biðtíma við brottför og heimför þegar hinkrað er eftir fólki sem að ætlar með en er "aðeins of seint".
 
Mér finnst kosturinn við Árósatilboðið vera hljómsveitin, en ókostirnir löng rútuferð, staðsetningin og 100 kr dýrara miðaverð.
Þegar allt er tekið saman, óska ég þess að það verði haldið í þá vinnu sem að nú þegar er búið að leggja í undirbúning fyrir okkar eigið blót og stjórn DIFN og þorrablótsnefnd taki höndum saman um að gera blótið okkar eins glæsilegt og mögulegt er.

Gleðilega aðventu.